Parte di l’insignamentu di u / in corsu

(Fonte : Retturatu di Corsica 2012)

L’articulu 7 di a lege di u 22 di ghjennaghju di u 2002 chì tocca à a Corsica stipuleghja chì a lingua corsa hè una materia « insegnata in lu quadru di l’urarii nurmali di e scole materne è elementarie ». Sta dispusizione hè guarantita da una cunvenzione Statu/ CTC, firmata u 30 d’Uttobre di u 2003, precisendu chì « un insignamentu di trè ore pè settimana figura annantu à u spartitempu di tutte e classe di u primu gradu »¹. Inde e scole classiche, ste ore so dispensate da u maestru di a classa s’ellu hè abilitatu², da un altru maestru di a scola in lu quadru di scambii di servizii, o da un intervenente da u fora abilitatu, in presenza di u maestru è sottu à a so respunsabilità pedagogica. Inde i siti è e classe bislingue (in u 2012, 33 % di i maestri sò abilitati), i corsi so assicurati da i maestri ricrutati per via di u cuncorsu specificu « lingue regiunale » o da i maestri abilitati. U corsu diventa una uzzione facultativa inde u secundariu à partesi da a 6esima è entra in e pussibilità di LV2 o LV3 à partesi di a 4esima. L’insignamenti ci so assicurati da un prufessore certificatu di Lingua è cultura corsa.